1यहोशवाने आय नगर जिंकून त्याचा कसा पूर्णपणे नाश केला, आणि जसे त्याने यरीहोचे व त्याच्या राजाचे केले तसेच आय नगराचे व त्याच्या राजाचे केले, पण गिबोनाचे रहिवासी इस्राएल लोकांशी समेट करून त्यांच्यामध्ये राहत आहेत, हे सर्व यरुशलेमेचा राजा अदोनीसदेक याने ऐकले होते.
2तेव्हा यरुशलेमातील लोक फार भयभीत झाले, कारण गिबोन हे मोठे शहर असून एखाद्या राजकीय नगरासारखे मोठे होते. ते आय नगरापेक्षा मोठे असून तेथले सगळे पुरुष पराक्रमी योध्दे होते.
3मग यरुशलेमेचा राजा अदोनिसदेक याने हेब्रोनाचा राजा होहाम, यर्मूथाचा राजा पिराम, लाखीशाचा राजा याफीय आणि एग्लोनाचा राजा दबीर यांना निरोप पाठविला,
4वर माझ्याकडे येऊन मला मदत करा, आपण गिबोनाला मार देऊ; कारण त्याने यहोशवाशी व इस्राएल लोकांशी समेट केला आहे.
5तेव्हा यरुशलेमेचा राजा, हेब्रोनाचा राजा, यर्मूथाचा राजा, लाखीशाचा राजा आणि एग्लोनाचा राजा या पांच अमोरी राजांनी एकत्र मिळून आपल्या सर्व सैन्यांसह चढाई केली आणि गिबोनासमोर तळ देऊन ते त्यांच्याशी लढू लागले.
6हे पाहून गिबोनातल्या माणसांनी गिलगालच्या छावणीत यहोशवाला निरोप केला की, आपल्या दासा वरील मदतीचा हात काढून घेऊ नको; आमच्याकडे लवकर येऊन आमचा बचाव कर व आम्हांला मदत कर; कारण डोंगरवटीतले सर्व आमोरी राजे एकत्र जमून आमच्यावर चालून आले आहेत
7तेव्हा यहोशवा आपले सर्व योद्धे व शूर वीर यांना बरोबर घेऊन गिलगाल येथून निघाला.
8देव यहोशवाला म्हणाला, त्यांना भिऊ नको; कारण मी त्यांना तुझ्या हाती दिले आहे; त्यातला कोणीही तुझ्यापुढे टिकणार नाही.
9यहोशवा गिलगालाहून सारी रात्र चालत चढून जाऊन त्यांच्यावर एकाएकी चाल करून आला
10आणि परमेश्वर देवाने इस्राएलापुढे शत्रूत गोंधळ उडवला. त्यांनी गिबोनापाशी त्यांची मोठी कत्तल करून बेथ-हारोनाच्या चढावाच्या वाटेने त्यांचा पाठलाग केला आणि अजेका व मक्केदा येथपर्यंत ते त्यांना मारीत गेले.
11ते इस्राएलापुढून बेथ-होरोनाच्या उतरणीवरून पळून जात असताना देवाने अजेकापर्यंत आकाशातून त्यांच्यावर गारांचे मोठे दगड फेकल्यामुळे ते ठार झाले. इस्राएल लोकांनी तरवारीने मारले त्यांपेक्षा जास्त लोक गारांच्या दगडांनी मेले.
12परमेश्वर देवाने अमोऱ्यांना इस्राएल लोकांच्या हाती दिले त्या दिवशी यहोशवा देवाशी बोलला; इस्राएलासमक्ष तो असे म्हणाला. हे सूर्या, तू गिबोनावर स्थिर हो; हे चंद्रा, तू अयालोनाच्या खोऱ्यावर स्थिर हो.
13तेव्हा राष्ट्राने आपल्या शत्रूंचा बदला घेईपर्यंत सूर्य स्थिर झाला आणि चंद्र थांबला. याशाराच्या ग्रंथात ही कथा लिहिली आहे ना? सूर्य आकाशाच्या मधोमध सुमारे एक संपूर्ण दिवस थांबला; त्याने अस्तास जाण्याची घाई केली नाही.
14असा दिवस त्यापूर्वी किंवा त्यानंतरही आला नाही; त्या दिवशी देवाने मानवाचा शब्द ऐकला, कारण देव इस्राएलासाठी लढत होता.
15मग यहोशवा सर्व इस्राएलासह गिलगाल येथील छावणीकडे परत आला.
16ते पाच राजे पळून जाऊन मक्केदा येथील एका गुहेत लपून बसले.
17मक्केदा येथील गुहेत ते पांच राजे लपलेले सापडले आहेत असे यहोशवाला कोणी कळवले
18तेव्हा यहोशवा म्हणाला, गुहेच्या तोंडावर मोठमोठे धोंडे लोटा आणि तिच्यावर माणसांचा पहारा बसवा.
19पण तुम्ही स्वतः तेथे थांबू नका; आपल्या शत्रूंचा पाठलाग करा; त्यांच्या पिछाडीच्या लोकांना ठार मारा; त्यांना त्यांच्या नगरांना जाऊ देऊ नका; कारण तुमचा देव परमेश्वर याने त्यांना तुमच्या हाती दिले आहे.
20यहोशवा आणि इस्राएल लोक यांनी त्यांची मोठी कत्तल करून त्यांचा नाश करण्याचे काम संपवले; पण त्यांतले काही लोक बचावून तटबंदीच्या नगरांत गेले.
21मग सर्व सैन्य मक्केदाच्या छावणीत यहोशवाकडे शांतीने माघारी आले; इस्राएलाविरुद्ध कोणी चकार शब्द काढण्याचे धाडस केले नाही.
22मग यहोशवा म्हणाला, गुहेचे तोड उघडून त्या पाच राजांना तेथून माझ्याकडे घेऊन या.
23त्याप्रमाणे त्यांनी केले म्हणजे यरुशलेमेचा राजा, हेब्रोनाचा राजा, यर्मूथाचा राजा, लाखीशाचा राजा आणि एग्लोनाचा राजा या पाच राजांना त्यांनी गुहेतून काढून त्याच्याकडे आणले.
24ते त्या राजांना यहोशवाकडे घेऊन आले तेव्हा त्याने सर्व इस्राएल लोकांना बोलावून आणले. मग तो आपल्याबरोबर लढाईवर गेलेल्या योध्दयांच्या सेनानायकांना म्हणाला, पुढे येऊन त्यांच्या मानेवर पाय द्या. तेव्हा त्यांनी पुढे येऊन त्यांच्या मानेवर पाय दिले.
25यहोशवा त्यांना म्हणाला, भिऊ नका, कचरू नका, बलवान व निर्भय व्हा; कारण ज्यांच्याशी तुम्ही लढाल त्या तुमच्या सर्व शत्रूंचे देव असेच करील.
26नंतर यहोशवा त्यांना ठार मारून पाच झाडांवर त्यांना टांगले, आणि ते संध्याकाळपर्यंत त्या झाडांवर टांगलेले होते.
27सूर्यास्तासमयी यहोशवाच्या आज्ञेवरून लोकांनी त्यांना त्या झाडांवरून उतरविले आणि ज्या गुहेत ते लपले होते तिच्यांत त्यांना टाकले आणि त्या गुहेच्या तोंडावर त्यांनी मोठमोठे धोंडे रचले. आजपर्यंत ते तसेच आहेत.
28त्या दिवशी यहोशवाने मक्केदा घेऊन तरवारीने त्यांचा व त्याच्या राजाचा पूर्णपणे नाश केला; त्यांच्याबरोबर तेथल्या प्रत्येक जीवंत प्राण्यांचाही त्याने नाश केला; त्याने कोणालाही जिवंत ठेवले नाही. त्यांने यरीहोच्या राजाचे जे केले तेच मक्केदाच्या राजाचेही केले.
29मग मक्केदाहून निघून सर्व इस्राएलास बरोबर घेऊन यहोशवा लीब्नावर चालून गेला व लिब्नाच्याविरूध्द त्यांनी लढाई केली;
30परमेश्वराने ते नगर व त्याचा राजा यांना इस्राएलाच्या हाती दिले आणि यहोशवाने त्याचा व त्या त्यातल्या सर्व जीवंत प्राण्यांचा तरवारीने संहार केला; त्यांतला कोणालाही जिवंत ठेवले नाही; यरीहोच्या राजाचे त्याने जे केले तेच येथल्याही राजाचे केले.
31त्यानंतर लीब्ना सोडून सर्व इस्राएलासह यहोशवा लाखीशावर चालून गेला. त्यासमोर तळ दिला आणि त्याच्याविरूध्द लढला.
32देवाने लाखीश इस्राएलाच्या हाती दिले व त्यांनी ते दुसऱ्या दिवशी घेतले, लीब्नाचा केला तसाच लाखीशाचा व तेथल्या प्रत्येक जीवंत प्राण्यांचा त्याने तरवारीने नाश केला.
33तेव्हा गेजेराचा राजा होरम लाखीशाला मदत देण्यासाठी चालून आला, पण यहोशवाने त्याचा व त्याच्या लोकांचा एवढा मार दिला की त्यांतला एकही जिवंत राहिला नाही.
34मग लाखीश सोडून यहोशवा सर्व इस्राएलासह एग्लोनावर चालून गेला; त्यासमोर तळ देऊन ते त्याच्याशी लढले.
35त्याच दिवशी त्यांनी ते घेतले आणि तरवारीने त्यांचा संहार केला; लाखीशांतल्याप्रमाणे तेथील प्रत्येक जीवंत प्राण्यांचा त्या दिवशी त्याने समूळ नाश केला.
36मग एग्लोन सोडून यहोशवा सर्व इस्राएलासह हेब्रोनावर चढाई करून गेला. आणि ते त्याच्याशी लढले;
37त्यांनी ते घेतले आणि ते नगर, त्याचा राजा, त्याची सर्व उपनगरे आणि त्यांतले सर्व प्राणी यांचा तरवारीने संहार केला; यहोशवाने एग्लोनातल्याप्रमाणेच येथेही कोणाला जिवंत राहू दिले नाही. त्याने त्याचा आणि त्यातल्या प्रत्येक जीवंत प्राण्यांचा समूळ नाश केला.
38नंतर यहोशवा सर्व इस्राएलासह मागे वळून दबीरास चालून गेला आणि त्याच्याविरूध्द लढला.
39त्याने ते तेथला राजा व त्याची सर्व उपनगरे हस्तगत करून त्यांचा तरवारीने संहार केला. तेथील प्रत्येक जीवंत प्राण्यांचा त्याने समूळ नाश केला. कोणाला जिवंत राहू दिले नाही हेब्रोनाचे, लीब्ना व त्याचा राजा यांचे त्याने जे केले तेच दबीर व त्याचा राजा यांचेही केले.
40या प्रकारे यहोशवाने त्या सर्व देशाचा म्हणजे डोंगराळ प्रदेश, नेगेव, तळवट व उतरण यातील सर्व प्रांत आणि त्यांचे राजे यास काबीज केले; कोणालाही जिवंत राहू देले नाही; इस्राएलाचा देव परमेश्वर याने आज्ञा केल्याप्रमाणे प्रत्येक जीवंत गोष्टीचा त्याने समूळ नाश केला
41यहोशवाने तरवारीने हल्ला करून कादेशबर्ण्यापासून गज्जापर्यंतचा मुलुख व गिबोनापर्यंतचा सर्व गोशेन प्रांत त्याने मारला.
42हे सर्व राजे व त्यांचे देश यहोशवाने एकाच वेळेस घेतले, कारण इस्राएलाचा देव परमेश्वर इस्राएलासाठी लढत होता.
43मग यहोशवा आणि त्याच्या बरोबर सर्व इस्राएल गिलगाल येथील छावणीकडे माघारी आले.