1मी परमेश्वराच्या विश्वासाच्या कराराची कृतीचे गाणे सर्वकाळ गाईन. मी तुझी सत्यता भावी पिढ्यांना जाहीर करीन.
2कारण मी म्हणालो आहे की,विश्वासाचा करार सर्वकाळासाठी स्थापित होईल; तुझी सत्यता स्वर्गात तूच स्थापन केली आहेस.
3मी माझ्या निवडलेल्याशी करार केला आहे, मी आपला सेवक दावीद ह्याच्याशी शपथ वाहिली आहे.
4मी तुझ्या वंशाजांची स्थापना सर्वकाळ करीन, आणि तुझे राजासन सर्व पिढ्यांसाठी स्थापिन.
5हे परमेश्वरा, तुझ्या विस्मयकारक कृतीची स्तुति आकाश करील, तुझ्या सत्यतेची स्तुति पवित्रजनांच्या मंडळीत होईल.
6कारण परमेश्वराशी तुलना होऊ शकेल असा आकाशात कोण आहे? देवाच्या मुलांपैकी परमेश्वरासारखा कोण आहे?
7पवित्र जनांच्या सभेत ज्याचा सन्मान होतो असा तो देव आहे आणि त्याच्या सभोवती असणाऱ्या सर्वांपेक्षा तो भीतिदायक आहे.
8हे सेनाधीश देवा,परमेश्वरा, हे परमेश्वरा, तुझ्यासारखा कोण समर्थ आहे? तुझी सत्यता तुझ्याभोवती आहे?
9समुद्राच्या खवळण्यावर तू अधिकार चालवतोस; जेव्हा त्याच्या लाटा उसळतात, तेव्हा तू त्यांना शांत करतोस.
10तू राहाबाला मारल्यासारखे ठेचून त्याचा चुराडा केलास. तू तुझ्या बलवान बाहूंनी आपल्या शत्रूंना पांगवलेस.
11आकाश तुझे आहे आणि पृथ्वीहि तुझी आहे. तू जग आणि त्यातले सर्वकाही निर्माण केलेस.
12उत्तरे आणि दक्षिण निर्माण केल्या. ताबोर आणि हार्मोन तुझ्या नावाचा जयजयकार करतात.
13तुला पराक्रमी भुज आहे आणि तुला बळकट हात आहे व तुझा उजवा हात उंचावला आहे.
14नीति आणि न्याय तुझ्या राजासनाचा पाया आहेत. कराराचा विश्वास आणि सत्य तुझ्यासमोर आहेत.
15जे तुझी उपासना करतात ते आशीर्वादित आहेत. हे परमेश्वरा ते तुझ्या मुखप्रकाशात चालतात.
16ते दिवसभर तुझ्या नावाची स्तुति करतात, आणि तुझ्या न्यायीपणाने ते तुला उंचावतात.
17त्यांच्या शक्तीचे वैभव तू आहेस, आणि तुझ्या कृपेने आम्ही विजयी आहोत.
18कारण आमची ढाल परमेश्वराची आहे; इस्राएलाचा पवित्र देव आमचा राजा आहे.
19पूर्वी तू आपल्या विश्वासणाऱ्यांशी दृष्टांतात बोललास; तू म्हणालास, “मी एका वीरावर मुकुट ठेवण्याचे ठरवले आहे; लोकांतून निवडलेल्या एकास मी उंचावले आहे.
20मी माझा सेवक दावीद याला निवडले आहे; मी त्याला आपल्या पवित्र तेलाने अभिषेक केला आहे.
21माझा हात त्याला आधार देईल; माझा बाहू त्याला बलवान करील.
22कोणी शत्रू त्याला फसवणार नाही. दुष्टांचे मुले त्याला छळणार नाहीत.
23मी त्याच्या शत्रूंना त्याच्यापुढे चिरडून टाकील; जे त्याचा द्वेष करतात त्यांना मारून टाकील.
24माझे सत्य आणि विश्वासाचा करार त्यांच्याबरोबर राहील; माझ्या नावाने ते विजयी होतील.
25मी त्याचा हात समुद्रावर आणि त्याचा उजवा हात नद्यांवर ठेवीन.
26तो मला हाक मारून म्हणेल, ‘तू माझा पिता, माझा देव, माझ्या तारणाचा खडक आहेस.’
27मीही त्याला माझा प्रथम जन्मलेला पुत्र करीन, पृथ्वीवरील राजात त्याला परमश्रेष्ठ करीन.
28मी आपला विश्वासाचा करार त्यांच्यासाठी सर्वकाळ विस्तारील, आणि त्यांच्याबरोबरचा माझा करार सर्वकाळ टिकेल.
29त्याचे वंश सर्वकाळ राहील आणि त्याचे राजासन आकाशाप्रमाणे टिकेल.
30जर त्याच्या वंशजांनी माझे नियम सोडले आणि माझ्या आदेशाचा आज्ञाभंग केला.
31जर त्यांनी माशे नियम मोडले आणि माझ्या आज्ञा पाळल्या नाहीत.
32मग मी त्यांच्या बंडखोरांना काठीने आणि त्यांच्या अपराधांना फटक्यांनी शिक्षा करीन.
33परंतु मी माझा विश्वासाचा करार त्यांच्यापासून काढून घेणार नाही किंवा मी माझ्या वचनाशी निष्ठावान राहीन.
34मी माझा करार मोडणार नाही किंवा माझ्या ओठांचे शब्द बदलणार नाही.
35एकदा आणि आपल्या पवित्रतेची शपथ वाहिली आहे की, तरीही मी दावीदाशी खोटे बोलणार नाही.
36त्याची संतती सर्वकाळ राहील, आणि त्याचे राजासन माझ्यासमोर सूर्याप्रमाणे कायम राहील.
37ते चंद्राप्रमाणे सर्वकाळ टिकेल. आकाशात विश्वासनीय साक्षीदार आहेत.
38पण तरी तू आपल्या अभिषिक्तावर रागावलास, तू त्याचा त्याग केला,आणि नाकारलेस.
39तू आपल्या सेवकाशी केलेला करार सोडून दिलास. तू त्याचा मुकुट भूमीवर फेकून भ्रष्ट केलास.
40तू त्याच्या सर्व भिंती पाडून टाकल्यास. तू त्याचे सर्व किल्ले उध्वस्त केलेस.
41सर्व येणारे जाणारे त्याला लुटतात. तो आपल्या शेजाऱ्यांच्या तिरस्काराचा विषय झाला आहे.
42तू त्याच्या शत्रूंचा उजवा हात उंच केला आहे. तू त्याच्या सर्व शत्रूंना आनंदित केले आहेस.
43तू त्यांच्या तरवारीची धार बोथट केली आहे. आणि युद्धात त्याला तू टिकाव धरू दिला नाही.
44तू त्याच्या तेजस्वितेचा शेवट केला; तू त्याचे सिंहासन जमिनीवर खाली आणलेस.
45तू त्याच्या तारुण्याचे दिवस कमी केले आहेत. तू त्याला लज्जेने झाकले आहेस.
46हे परमेश्वरा, किती वेळ? तू आपल्या स्वतःला सर्वकाळ लपविणार काय? तुझा राग अग्नीसारखा किती वेळ जळेल ?
47माझे आयुष्य किती कमी आहे याविषयी विचार कर, तू सर्व मानव पुत्र निर्माण केलेस ते व्यर्थच काय?
48कोण जिवंत राहिल आणि मरणार नाही किंवा कोण आपला जीव अधोलोकातून सोडवील?
49हे प्रभु, ज्या सत्यतेत तू दावीदाशी शपथ वाहिली, ती तुझी पूर्वीची विश्वासाच्या कराराची कृत्ये कोठे आहेत?
50हे प्रभु, तुझ्या सेवकाविरूद्धची थट्टा होत आहे आणि अनेक राष्ट्राकडून झालेला अपमान मी आपल्या हृदयात सहन करत आहे हे तू लक्षात आण.
51हे परमेश्वरा,तुझे शत्रु जोराने अपमान करतात; ते तुझ्या अभिषिक्ताच्या पावलांची थट्टा करतात.
52परमेश्वराला सदासर्वकाळ धन्यवाद असो. आमेन आणि आमेन.