1हे परमेश्वरा, मला दुष्टांपासून सोडव; जुलमी माणसापासून मला सुरक्षित ठेव.
2ते आपल्या मनात वाईट योजना करतात; ते प्रत्येक दिवशी भांडणाला सुरुवात करतात.
3त्यांची जीभ सर्पासारखी जखम करते; त्यांच्या ओठाखाली विषारी सर्पाचे विष आहे.
4हे परमेश्वरा, मला दुष्टांच्या हातातून वाचव; मला जुलमी माणसांपासून सुरक्षित ठेव. त्यांनी मला ढकलण्याची योजना केली आहे.
5गर्विष्ठांनी माझ्यासाठी पाश व दोऱ्या लपवून ठेविल्या आहेत; त्यांनी रस्त्याच्या बाजूला जाळे पसरले आहे; त्यांनी माझ्यासाठी सापळा लावला आहे.
6मी परमेश्वराला म्हणतो, तू माझा देव आहेस;हे परमेश्वरा, माझ्या विनवण्यांच्या वाणीकडे कान दे.
7हे परमेश्वरा, माझ्या प्रभु, माझ्या तारणसामर्थ्या, तू माझ्या लढाईच्या दिवसात माझे शिरस्राण आहेस.
8हे परमेश्वरा, दुष्टांच्या इच्छा पुरवू नको, त्यांच्या दुष्ट योजना यशस्वी होऊ देऊ नकोस.
9ज्यांनी मला घेरले आहे त्यांच्या ओठापासून होणारा अनर्थ त्यांच्याच शिरी पडो.
10त्यांच्यावर जळते निखारे पडोत; त्यांना अग्नीत, ज्यातून त्यांना उठून वर कधीही येता येणार नाही अशा खड्‌यात फेकून दे.
11वाईट बोलणारा पृथ्वीवर सुरक्षित केला जाणार नाही; जुलमी माणसाच्या पाठीस अरिष्ट एकसारखे लागेल.
12परमेश्वर गरीबांच्या पक्षाचे, आणि गरजवंताच्या वादाचे समर्थन करील हे मला माहीत आहे.
13खचित नीतिमान तुझ्या नावाची उपकारस्तुती करतील; सरळ मनाचे तुझ्या समक्षतेत राहतील.