1मग येशू त्याच्या शिष्यांना म्हणाला, “ज्यामुळे लोक पाप करतील त्या येतीलच पण ज्याच्यामुळे ती येतात त्याची केवढी दुर्दशा होणार!
2त्याने या लहानातील एकाला पाप करावयास लावण्यापेक्षा त्याच्या गळ्यात जात्याची तळी बांधून त्याला समुद्रात टाकावे ह्यात त्याचे हित आहे.
3स्वतःकडे लक्ष द्या! जर तुमचा भाऊ पाप करतो तर त्याला धमकावा. आणि जर तो पश्चात्ताप करतो तर त्याला माफ करा.
4जर तो दिवसातून सात वेळा तुझ्याविरुध्द पाप करतो आणि सात वेळा तुझ्याकडे येतो व म्हणतो, “मी पश्चात्ताप करतो, ’ तरीही तू त्याला माफ कर.
5मग शिष्य प्रभू येशूला म्हणाले, 'आमचा विश्वास वाढव'.
6प्रभू येशू म्हणाला, 'जर तुमचा विश्वास मोहरीच्या दाण्याएवढा असेल तर तुम्ही या तुतीच्या झाडाला म्हणू शकता, मुळासकट उपटून समुद्रात लावली जा.’ तर ते झाड तुमचे ऐकेल.
7तुमच्यापैकी असा कोण आहे की, त्याचा नांगरणारा किंवा मेंढरे राखणारा दास शेतातून आल्यावर तो त्याला म्हणेल, 'आत्ताच येऊन जेवायला बस.'
8उलट माझे जेवण तयार कर, माझे खाणेपिणे होईपर्यंत कंबर बांधून माझी सेवा कर, आणि मग तू खा व पी, असे तो त्याला म्हणणार नाही काय?
9ज्या गोष्टी करण्याबद्दल तुम्ही नोकराला हुकुम करता ते केल्याबद्दल तुम्ही त्याला धन्यवाद म्हणता का?
10तुमच्या बाबतीतही तसेच आहे. जेव्हा तुम्हाला करण्यास सांगितलेली सर्व कामे केल्यावर तुम्ही असे म्हटले पाहिजे, 'आम्ही कोणत्याही मानास लायक नसलेले नोकर आहोत आम्ही फक्त आमचे कर्तव्य केले आहे.'
11मग असे झाले की, तो यरुशलेमेकडे चालला असता, शोमरोन व गालीलच्या सीमा ह्यांमधून गेला.
12तो कोणाएका खेड्यात जात असताना तेथे त्याला कुष्ठरोगाने ग्रस्त दहा पुरूष भेटले
13आणि ते दूर उभे राहून मोठमोठ्याने ओरडून म्हणाले 'येशू, स्वामी, आमच्यावर दया करा, ' असे बोलून त्यांनी त्याच्याकडे आरोळी केली
14जेव्हा येशूने कुष्ठरोग्यांना कुष्ठरोगी याजकांद्वारे निरीक्षण करून घेतल्यावर समाजात घेतले जात असता पाहिले, तेव्हा तो त्यांना म्हणाला, “जा, आणि स्वतःला याजकांना दाखवा.' ते याजकाकडे जात असतांनाच शुध्द झाले,
15जेव्हा त्यांच्यातील एकाने पाहिले की, आपण बरे झालो आहोत, तेव्हा तो परत आला व तो मोठ्याने ओरडून देवाचे गौरव करू लागला.
16तो येशूच्या पायाजवळ खाली पडला व त्याने त्याला नमन केले. तसेच त्याने त्याचे उपकार मानले. तो एक शोमरोनी होता.
17येशू त्याला म्हणाला, 'दहाजण शुध्द झाले नाहीत काय? बाकीचे नऊजण कोठे आहेत?
18या विदेशी माणसाशिवाय कोणीही देवाचे गौरव करण्यासाठी परत आला नाही काय?”
19तो त्याला म्हणाला, ' ऊठ, आणि जा. तुझ्या विश्वासाने तुला बरे केले आहे'
20परूश्यांनी येशूला विचारले, देवाचे राज्य केव्हा येईल, येशूने त्यांना उत्तर दिले, “ देवाचे राज्य दृश्य स्वरुपात येत नाही.
21' पाहा, ते येथे आहे किंवा तेथे आहे!असे म्हणणार नाहीत कारण देवाचे राज्य तर तुमच्यामध्ये आहे.'
22शिष्यांना तो म्हणाला, 'मनुष्याच्या पुत्राच्या येण्याच्या दिवसापैकी एका दिवसाची तुम्ही आतुरतेने वाट पाहाल. पण तो दिवस तुम्ही पाहू शकणार नाही, असे दिवस येतील.'
23आणि लोक तुम्हाला म्हणतील, “पाहा, तो तर येथे आहे किंवा पाहा, तो तेथे आहे, तेव्हा तुम्ही मला पाहाण्यासाठी त्यांच्यामागे जाऊ नका.
24“कारण जशी वीज आकाशाच्या एका सिमेपासुन दुसऱ्या सिमेपर्यंत चमकते तसेच मनुष्याच्या पुत्राचे येणे त्याच्या दिवसात होईल.
25पण पहिल्याने त्याने खूप दुःख भोगावे व या पिढीकडून नाकारले जावे याचे अगत्य आहे.
26जसे नोहाच्या दिवसात झाले, तसेच मनुष्याच्या पुत्राच्या दिवसात पण होईल.
27नोहाने तारवांत प्रवेश केला आणि मग महापूर आला व त्या सर्वांचा नाश झाला त्या दिवसापर्यंत ते खात होते, पीत होते, लग्न करून घेत होते आणि लग्न करुनही देत होते.
28त्याचप्रमाणे, लोटाच्या दिवसात झाले तसे होईलः ते खात होते, पीत होते. विकत घेत होते. विकत देत होते. लागवड करीत होते. बांधीत होते.
29पण ज्या दिवशी लोट सदोम सोडून बाहेर निघाला त्या दिवशी आकाशातून आग व गंधक यांचा पाऊस पडला आणि सर्वांचा नाश केला.
30मनुष्याचा पुत्र प्रकट होण्याच्या दिवशीही असेच घडेल
31“त्या दिवशी जर एखादा छपरावर असेल व त्याचे सामान घरात असेल, तर त्याने ते बाहेर काढण्यासाठी घरात जाऊ नये. त्याचप्रमाणे जो शेतात असेल त्याने परत जाऊ नये.
32लोटाच्या बायकोची आठवण करा.
33जो कोणी आपला जीव वाचवू पाहतो तो आपला जीव गमवेल आणि जो कोणी आपला जीव गमावील तो त्याला वाचवील.
34मी तुम्हाला सांगतो, त्या रात्री बिछान्यावर दोघे असतील, त्यांच्यामधून एक घेतला जाईल व दुसरा ठेवला जाईल.
35दोन स्त्रिया दळण करत असतील, तर त्यांपैकी एक घेतली जाईल व दुसरी ठेवली जाईल.
36शेतात दोघे असतील एकाला घेतले जाईल व दुसऱ्यायाला ठेवले जाईल.”
37शिष्यांनी त्याला विचारले, 'कोठे प्रभू?' येशूने उत्तर दिले, जेथे प्रेत असेल तेथे गिधाडे जमतील.'