1आता पलिष्टयांनी देवाचा कोश घेतला होता तो त्यांनी एबन-एजराहून अश्दोदास नेला.
2आणि पलिष्टयांनी देवाचा कोश घेतला तो त्यांनी दागोनाच्या देवळात नेऊन दागोनाच्याजवळ ठेवला.
3जेव्हा अश्दोदकर दुसऱ्या दिवशी पहाटेस उठले तेव्हा पाहा देवाच्या कोशापुढे दागोन भूमीवर पालथा पडला आहे. तेव्हा त्यांनी दागोन उचलून घेउन त्याच्या ठिकाणी परत ठेवला.
4पण ते दुसऱ्या दिवशी पहाटेस उठल्यावर पाहा देवाच्या कोशापुढे दागोन भूमीवर पालथा पडला आहे आणि दागोनाचे डोके व त्याच्या हाताचे दोन्ही पंजे तुटलेले उंबऱ्यावर पडले आहेत; दागोनाचे धड तेवढे त्याला राहिले होते.
5याकरिता आजपर्यत दागोनाचे याजक व दागोनाच्या घरात जाणारे ते अश्दोदकर दागोनाच्या उंबरठ्याऱ्यावर पाय ठेवत नाहीत.
6मग अश्दोदकरावर परमेश्वराचा भारी हात पडला व त्याने त्यांचा नाश केला म्हणजे अश्दोदाला आणि त्यांच्या प्रदेशातील लोकांना गाठीच्या पिडेने पिडले.
7तेव्हां अश्दोदकरांनी जे काही घडत आहे ते ओळखले ते म्हणाले इस्त्राएलाच्या देवाचा कोश आम्हामध्ये राहू नये कारण त्याचा हात आम्हांवर व आमच्या दागोन देवाविरुध्द भारी झाला आहे.
8मग त्यांनी माणसे पाठवून पलिष्ट्यांच्या सर्व अधिकाऱ्यांना आपणाकडे एकवट करून म्हटले इस्त्राएलाच्या देवाच्या कोशाचे आम्ही काय करावे? ते बोलले इस्त्राएलाच्या देवाचा कोश गथाला न्यावा मग त्यांनी इस्त्राएलाच्या देवाचा कोश तेथे नेला.
9परंतु असे झाले की त्यांनी तो तेथे नेल्यावर परमेश्र्वराचा हात त्याच्यावर पडून त्या नगरात मोठा गोंधळ उडाला. त्याने नगरातली लहान आणि मोठी माणसे यांना पिडले. आणि त्यांच्या अंगावर गाठी उठल्या
10मग त्यांनी देवाचा कोश एक्रोनाला पाठवला; आणि असे झाले की देवाचा कोश एक्रोन येथे येताच एक्रोनकर ओरडून म्हणाले आम्हांला व आमच्या लोकांना मारायला इस्त्रालाच्या देवाचा कोश त्यांनी आमच्याकडे आणला आहे.
11मग त्यांनी माणसे पाठवून पलिष्ट्यांच्या सर्व अधिकाऱ्यांना एकत्र करून म्हटले इस्त्राएलाच्या देवाचा कोश त्याच्याजागी परत पाठवून द्या; यासाठी की त्याने आम्हाला व आमच्या लोकांना मारू नये; कारण तेथे सर्व नगरात मरणाच भयंकर भय होत देवाचा जबरदस्त हात त्यांच्यावर पडला होता.
12आणि जी माणसे मेली नाहीत त्यास त्यांना गाठीने पिडले आणि नगराचा आरोळी वर आकाशापर्यत गेली.