1దేవుడైన యెహోవా చేసిన జంతువులన్నిటిలో పాము జిత్తులమారి. వాడు ఆ స్త్రీతో, <<నిజమేనా? <ఈ తోటలో ఉన్న చెట్లలో ఏ పండ్లూ మీరు తినకూడదు> అని దేవుడు చెప్పాడా?>> అన్నాడు.
2స్త్రీ ఆ సర్పంతో, <<ఈ తోటలో ఉన్న చెట్ల పండ్లు మేము తినవచ్చు.
3కానీ తోట మధ్యలో ఉన్న చెట్టు పండ్ల విషయంలో, <మీరు వాటిని తినకూడదు. వాటిని ముట్టుకోకూడదు. అలా చేస్తే మీరు చనిపోతారు> అని దేవుడు చెప్పాడు>> అంది.
4పాము స్త్రీతో, <<మీరు చావనే చావరు.
5ఎందుకంటే, మీరు అది తిన్న రోజున మీ కళ్ళు తెరుచుకుంటాయి. మీరు మంచి చెడ్డలు తెలిసి, దేవుడిలా ఉంటారని దేవునికి తెలుసు>> అన్నాడు.
6స్త్రీ, ఆ చెట్టు తినడానికి మంచిదిగా, కంటికి ఇంపుగా, వివేకం కలగడం కోసం కోరదగినదిగా ఉండడం చూసి, దాని పండ్లలో కొన్నిటిని కోసి తిని, తనతోపాటు తన భర్తకు కూడా ఇచ్చింది. అతను కూడా తిన్నాడు.
7అప్పుడు వాళ్ళిద్దరికీ కళ్ళు తెరుచుకున్నాయి. వాళ్ళు తాము నగ్నంగా ఉన్నాం అని తెలుసుకొని, అంజూరపు ఆకులు కుట్టి తమను కప్పుకునేందుకు దుస్తులు చేసుకొన్నారు.
8సాయంత్రం చల్లబడిన తరువాత ఆ తోటలో దేవుడు నడుస్తున్న శబ్ధం వాళ్ళు విన్నారు. ఆదాము, అతని భార్య దేవుడైన యెహోవాకు ఎదురు పడకుండా తోటలో చెట్ల మధ్య దాక్కొన్నారు.
9దేవుడైన యెహోవా ఆదామును పిలుస్తూ, <<నువ్వెక్కడ ఉన్నావు?>> అన్నాడు.
10అతను, <<నేను తోటలో నీ స్వరం విన్నప్పుడు నగ్నంగా ఉన్నాను గనుక భయపడి దాక్కొన్నాను>> అన్నాడు.
11దేవుడు, <<నువ్వు నగ్నంగా ఉన్నావని నీకెవరు చెప్పారు? తినొద్దని నీకు ఆజ్ఞ ఇచ్చిన ఆ చెట్టు పండు తిన్నావా?>> అన్నాడు.
12ఆదాము, <<నాతో ఉండడానికి నువ్వు నాకిచ్చిన స్త్రీ నాకు ఆ చెట్టు పండు ఇచ్చింది. అప్పుడు నేను దాన్ని తిన్నాను>> అన్నాడు.
13దేవుడైన యెహోవా స్త్రీతో, <<నువ్వు చేసిందేమిటి?>> అన్నాడు. స్త్రీ, <<సర్పం నన్ను మోసం చేసిన కారణంగా నేను తిన్నాను>> అంది.
14అందుకు దేవుడైన యెహోవా పాముతో, <<నువ్వు ఇలా చేసినందుకు పశువులన్నిటిలో, జంతువులన్నిటిలో నిన్ను మాత్రమే శపిస్తున్నాను. నువ్వు నీ కడుపుతో పాకుతూ వెళ్తావు. బ్రతికినంత కాలం మట్టి తింటావు.
15నీకూ స్త్రీకి, నీ సంతానానికి ఆమె సంతానానికి మధ్య శత్రుత్వం ఉండేలా చేస్తాను. అతడు నిన్ను తలమీద కొడతాడు. నువ్వు అతన్ని మడిమె మీద కొడతావు>> అన్నాడు.
16ఆయన స్త్రీతో, <<పిల్లల్ని కనేటప్పుడు నీకు కలిగే బాధ అనేక రెట్లు పెంచుతున్నాను. నీ భర్తపై కోరిక కలిగి ఉంటావు. అతను నిన్ను ఏలుతాడు>> అని చెప్పాడు.
17ఆయన ఆదాముతో, <<నువ్వు నీ భార్య మాట విని, <తినొద్దు> అని నేను నీకు ఆజ్ఞ ఇచ్చిన ఆ చెట్టు పండు తిన్నావు గనుక నిన్నుబట్టి నేల శాపానికి గురయ్యింది. బ్రతికిన రోజులన్నీ కష్టం చేసి నువ్వు దాని పంట తింటావు.
18నువ్వు ఎంత కష్టం చేసినా నేల ముళ్ళ తుప్పలు, ముళ్ళ పొదలే మొలిపిస్తుంది. నువ్వు పొలంలో పండించిన పంట తింటావు.
19నువ్వు మట్టికి తిరిగి చేరే వరకూ చెమటోడ్చి ఆహారం తింటావు. ఎందుకంటే నిన్ను తీసింది మట్టిలోనుంచే. నువ్వు మట్టే గనుక మళ్ళీ మట్టైపోతావు>> అని చెప్పాడు.
20ఆదాము తన భార్యకు హవ్వ అని పేరు పెట్టాడు. ఎందుకంటే, జీవులందరికీ ఆమే తల్లి.
21దేవుడైన యెహోవా ఆదాముకు అతని భార్యకు జంతు చర్మం బట్టలు చేసి వాళ్లకు తొడిగించాడు.
22దేవుడైన యెహోవా, <<ఇప్పుడు మనిషి మంచి చెడ్డలు తెలిసిన మనలాంటివాడయ్యాడు. కాబట్టి ఒకవేళ అతను తన చెయ్యి చాపి ఆ జీవ వృక్షఫలం కూడా తీసికొని తిని శాశ్వతంగా జీవిస్తాడేమో. అతనికి అలా జరగనివ్వకూడదు>> అన్నాడు.
23దేవుడైన యెహోవా అతణ్ణి ఏ నేలనుంచి తీశాడో ఆ నేలను సేద్యం చెయ్యడానికి ఏదెను తోటలోనుంచి అతణ్ణి పంపివేశాడు.
24కాబట్టి దేవుడు ఏదెను తోటలోనుంచి ఆదామును వెళ్ళగొట్టి, ఏదెను తోటకు తూర్పు వైపు కెరూబులు, జీవవృక్షానికి వెళ్ళే దారిని కాపలా కాయడానికి ఇటు అటు తిరిగే అగ్నిఖడ్గం నిలబెట్టాడు.