1तर आता हे याकोबा, ज्या कोणी तुला उत्पन्न केले आणि हे इस्त्राएला, ज्या कोणी तुला घडले, तो परमेश्वर असे म्हणतो, “भिऊ नकोस,कारण मी तुला खंडणी भरून सोडवले आहे; मी तुला नाव घेऊन बोलावले आहे, तू माझा आहेस.
2जेव्हा तू पाण्यातून जाशील, मी तुझ्या बरोबर असेल; आणि नद्यातून जाशील त्या तुला पूर्ण झाकणार नाहीत. जेव्हा तू अग्नीतून चालत जाशील,तू जळणार नाहीस किंवा ज्वाला तुला इजा करणार नाही.
3कारण मी तुझा देव परमेश्वर,इस्त्राएलाचा एक पवित्र,तुझा तारणारा आहे. मी तुझ्याकरता मिसर खंडणी म्हणून दिला आहे, तुझ्यासाठी मी कूश व सबा यांची अदलाबदल केली आहे.
4तू माझ्या दृष्टीने मोलवान आणि विशेष आहेस, मी तुझ्यावर प्रीती करतो; म्हणून मी तुझ्याबद्दल लोक आणि तुझ्या जिवाबद्दल दुसरे लोक देईन.
5घाबरू नकोस,कारण मी तुझ्याबरोबर आहे; मी पूर्वेपासून तुझी संतती आणीन, आणि पश्चिमेकडून तुला एकत्र गोळा करीन.
6मी उत्तरेला म्हणेन, त्यांना देऊन टाक;आणि दक्षिणेला म्हणेन, कोणालाही मागे धरून ठेवू नको; माझे मुले दुरून आणि माझ्या मुलींना पृथ्वीच्या दूर सीमेपासून आण.
7ज्या प्रत्येकाला माझ्या नावाने बोलावले आहे, ज्याला मी माझ्या गौरवासाठी निर्मिले आहे, ज्याला मी घडविले,होय, ज्याला मी केले आहे.
8जे कोणी डोळे असून आंधळे व कान असून बहिरे त्यांना बाहेर आण.
9सर्व राष्ट्रे एकत्र जमोत आणि लोकांनी एकत्र गोळा होवोत. त्यांच्यातील कोण हे जाहीर करेल आणि आम्हाला पूर्वीच्या घडलेल्या घटनांचे निवेदन करील? त्यांनी आपणास योग्य सिद्ध करण्यास आपले साक्षीदार आणावेत, त्यांनी ऐकून व खात्रीपूर्वक म्हणावे की हे खरे आहे.
10परमेश्वर जाहीर करतो, “तुम्ही माझे साक्षीदार आहात आणि माझा सेवक ज्याला मी निवडले आहे, अशासाठी की, तुम्ही जाणावे व माझ्यावर विश्वास ठेवावा आणि मीच तो आहे हे समजावे. माझ्याआधी कोणी देव निर्माण झाला नाही आणि माझ्यानंतर कोणीही व्हायचा नाही.
11मी,मीच परमेश्वर आहे आणि माझ्यावाचून कोणीही तारणारा नाही.
12मीच तारण जाहीर केले आहे, आणि घोषणा करतो आणि तुमच्यात कोणी दुसरा देव नाही. तुम्हीच माझे साक्षीदार आहात. मी देव आहे. असे परमेश्वर म्हणतो.
13यादिवसापासून मीच तो आहे, आणि माझ्या हातातून कोणीही सोडवू शकणार नाही.मी कृती करतो आणि ती कोणाच्याने परत बदलू शकेल?
14परमेश्वर,तुमचा उद्धारक,इस्राएलाचा एक पवित्र म्हणतो, “ कारण मी तुझ्यासाठी बाबेलला निरोप पाठवीन आणि त्या सर्वांना खाली फरार करीन, खास्द्यांचे हर्षाचे अविर्भाव विलापगीतात बदलेल.
15मी परमेश्वर आहे,तुमचा एक पवित्र, इस्राएलाचा निर्माणकर्ता, तुमचा राजा आहे.
16परमेश्वर जो समुद्रातून मार्ग आणि प्रचंड पाण्यातून वाट उघडतो,
17“जो रथ व घोडा, सैन्य व वीर यांना बाहेर काढून आणतो.ते एकत्रित खाली पडतात; ते पुन्हा कधीच उठत नाही;ते विझले आहेत,वातीप्रमाणे मालवले आहेत.
18पूर्वीच्या ह्या गोष्टींबद्दल विचार करू नका, किंवा फार पूर्वीच्या गोष्टी मनात आणू नका.
19पाहा, मी एक नवी गोष्ट करणार आहे; आता ती घडण्याची सुरवात होत आहे;तुम्ही ती पाहणार नाही का? मी रानातून रस्ता तयार करीन आणि वाळवंटातून पाण्याचे प्रवाह वाहवीन.
20रानातले वन्यपशू कोल्हे व शहामृग मला मान देतील, कारण मी आपल्या निवडलेल्या लोकांना पिण्यासाठी रानात पाणी आणि वाळवंटात नद्या देईन,
21ह्या लोकांना मी आपल्यासाठी निर्मिले, त्यांनी माझी स्तुतिस्तोत्रे कथन करावी.
22हे याकोबा, तू मला हाक मारली नाहीस;पण हे इस्त्राएला,तू मला कंटाळला आहेस.
23तू मला होमार्पणासाठी आपल्या मेंढरातील एकही माझ्याकडे आणले नाहीस; किंवा तुझ्या अर्पणाने माझा मान राखला नाहीस. मी तुझ्यावर अन्नार्पणांचा भार घातला नाही आणि तुला धूपार्पणाकरता त्रास दिला नाही.
24तू माझ्यासाठी गोड सुगंधीत ऊस पैका देऊन आणला नाही,आपल्या यज्ञबलीच्या वपेने तू मला तृप्त केले नाही. पण तू आपल्या पापांचा भार माझ्यावर घातला आहे.तू आपल्या वाईट कृत्यांनी मला श्रमविले आहे.
25“मी, होय,मी आपल्यासाठी तुझी पापे पुसून टाकतो; तो मी,मीच आहे,आणि तुझी पातके यापुढे मी लक्षात ठेवणार नाही.
26जे घडले त्याची मला आठवण दे. आपण परस्पर वाद करू; तू न्यायी सिद्ध व्हावे म्हणून तू आपला वाद पुढे मांड.
27तुझ्या पहिल्या पित्याने पाप केले आणि तुझ्या शिक्षकांनी माझ्याविरूध्द अपराध केला आहे.
28म्हणून मी पवित्रस्थानाच्या अधिपतींना अशुद्ध करीन. मी याकोबाला बंदी असलेल्या विध्वंसाच्या हाती देईल आणि इस्त्राएलास शिवीगाळ करून अपमान करील.