1परंतु शेवटल्या दिवसांत असे होईल की, परमेश्वराच्या घराचा पर्वत, इतर पर्वतांवर स्थापित केला जाईल व तो डोंगरावर उंचावला जाईल. आणि लोकांचा प्रवाह त्याकडे येईल.
2पुष्कळ देश त्याच्याकडे जातील व म्हणतील, “या, आपण परमेश्वराच्या पर्वतावर, याकोबाच्या देवाच्या घराकडे जाऊ या. मग तो त्याचे मार्ग आपल्याला शिकवील, आणि आपण त्याच्या मार्गांचे अनुसरण करु.” कारण सियोनमधून नियमशास्र आणि यरुशलेमेतून परमेश्वराचे वचन निघेल.
3तेव्हा पुष्कळ लोकांच्यामध्ये तो न्याय करील, आणि तो दुरच्या राष्ट्रांविषयी निर्णय ठरवील. ते आपल्या तरवारी मोडून ठोकून त्यांचे नांगर बनवतील, आणि आपल्या भाल्यांचा कोयते करतील. राष्ट्र राष्ट्रांविरूद्ध तरवार उचलणार नाही, आणि त्यांना युध्दाचे शिक्षण दिले जाणार नाही.
4त्याऐवजी, प्रत्येक मनुष्य आपल्या द्राक्षवेलीखाली आणि आपल्या अंजिराच्या झाडाखाली बसतील. त्यांना कोणीही घाबरवणार नाही. कारण सेनाधीश परमेश्वराच्या तोंडची ही वाणी आहे.
5कारण सर्व लोक, प्रत्येकजण आपापल्या दैवाच्या नावाने चालतात. पण आम्ही आमचा देव परमेश्वर याच्या नावात सदासर्वकाळ चालू.
6परमेश्वर म्हणतो, “त्या दिवसांत, मी लंगड्यांना एकत्र करीन, आणि जे बहिष्कृत व ज्याला मी पिडले, त्याला मी एकवट करीन.
7मी लंगड्यांना शेष म्हणून ठेवीन, आणि दूर घालवल्यांचे बलशाली राष्ट्र करीन.” आणि आता व सदासर्वकाळ, मी परमेश्वर सियोन पर्वतावर त्यांच्यावर राज्य करील.
8आणि तू, कळपासाठीच्या बुरूजा, सियोन कन्येच्या टेकाडा, तुझे पूर्वीचे राज्या तुला परत येईल. यरुशलेमेच्या कन्येचे राज्य तुला प्राप्त होईल.
9आता, तू एवढ्या मोठ्याने का रडत आहेस? काय तुझ्यात राजा नाही? काय तुझा सल्लागर नष्ट झाला आहे? कारण प्रसवत्या स्रीसारख्या कळा तुला लागल्या आहेत.
10सियोनच्या कन्ये, प्रसवतीप्रमाणे वेदना पाऊन प्रसुत हो, कारण आता तु शहरातून बाहेर जाशील, शेतात राहशील, आणि बाबेलला जाशील. तेथे तुझी सुटका होईल, आणि परमेश्वर तुला तुझ्या शत्रूंच्या हातातून सोडवील.
11आता पुष्कळ राष्ट्रे तुझ्याविरुध्द गोळा झाली आहेत. ती म्हणतात, “ती भ्रष्ट करण्यात येवो; आणि आमचे डोळे सियोनवर तृप्त होवोत.”
12संदेष्टा म्हणतो, त्यांना परमेश्वराचे विचार कळत नाहीत, आणि त्यांना त्याच्या योजणा समजत नाही. कारण जश्या पेंढ्या खळ्यात गोळा करतात तसे त्याने त्यांना गोळा केले आहे.
13परमेश्वर म्हणतो, “सियोनेच्या कन्ये, ऊठ आणि मळणी कर, मी तुला लोखंडाची शिंगे व कास्याचे खूर करीन. तु पुष्कळ लोकांचा चुराडा करशील. मी त्यांची संपत्ती परमेश्वराला आणि त्यांचे धन जगाच्या प्रभूला समर्पित करीन.”