1मग त्याने त्या बारा जणांस एकत्र बोलावून त्यांना सर्व भूतांवर, आणि रोग बरे करायला, सामर्थ्य व अधिकार दिला,
2आणि त्याने त्यांना देवाच्या राज्याविषयीचा संदेश जाहीर करायला व रोग्यांना बरे करायला पाठवले.
3तो त्यांना म्हणाला, वाटेसाठी काही घेऊ नका; काठी किंवा झोळी किंवा भाकर किंवा पैसा घेऊ नका आणि दोन- दोन अंगरखेही घेवू नका.
4आणि ज्या कोणत्याही घरात तुम्ही जाल, तेथेच राहा, व तेथूनच निघून जा.
5आणि जितके तुम्हाला अंगीकारीत नाहींत तितक्यांच्याविरुध्द साक्ष व्हावी म्हणून तुम्ही त्या नगरातून निघते वेळी आपल्या पायांची धूळ झाडून टाका.
6तेव्हा ते निघाले, आणि सर्व ठिकाणी सुवार्ता सांगत व रोग बरे करीत गांवोगांवी फिरत गेले.
7घडत असलेल्या सर्व गोष्टी ऐकून हेरोद राजा फार घोटाळ्यात पडला, कारण योहान मेलेल्यांमधून उठला आहे असे कित्येक म्हणत होते;
8आणि कित्येक म्हणत होते की एलिया प्रकट झाला आहे, आणि दुसरे म्हणत होते की पुरातन भविष्यवाद्यांतील कोणीएक उठला आहे.
9तेव्हा हेरोद म्हणाला, योहानाचे शीर मी तोडले, पण ज्याच्याविषयी अशा गोष्टी मी ऐकतो तो हा कोण आहे? आणि तो त्याला भेटायला पाहत होता.
10मग प्रेषितांनी परत येऊन आपण जे काही केले होते ते त्याला सविस्तर सांगितले. मग तो त्यांना बरोबर घेऊन बेथसैदा नावाच्या नगराकडे एकीकडे गेला.
11परंतु ह्याविषयी लोकांनी ऐकल्यावर ते त्याच्यामागे गेले. तेव्हा तो त्यांचे स्वागत करून त्यांच्याशी देवाच्या राज्याविषयी बोलूं लागला, आणि ज्यांना बरे होण्याची गरज होती त्यांना त्याने बरे केले.
12दिवस संपत आला, तेव्हा बारा जण जवळ येऊन त्याला म्हणाले, “समुदायाला निरोप दे, म्हणजे ते आसपासच्या गावांत व खेड्यांत जाऊन उतरतील व खाण्याची सोय करतील; कारण आपण येथे रानातल्या ठिकाणी आहो.“
13पण तो त्यांना म्हणाला, “तुम्हीच त्यांना खायला द्या.“ ते म्हणाले, “आम्ही जाऊन ह्या लोकांसाठी अन्न विकत आणले नाही, तर पाच भाकरी व दोन मासे एवढ्याशिवाय आम्हाजवळ काही नाही.“
14कारण ते सुमारे पाच हजार पुरूष होते. तेव्हा त्याने आपल्या शिष्यांना सांगितले, 'पन्नास पन्नास जणांच्या पंक्ती करून त्यास बसवा, '
15मग त्यांनी सांगितल्याप्रमाणे करून सर्वांस बसवले.
16त्याने त्या पांच भाकरी व ते दोन मासे घेतले, आणि वर स्वर्गाकडे पाहून त्यास आशीर्वाद दिला आणि त्यांचे तुकडे करून ते लोकसमुदायाला वाढण्याकरता शिष्यांजवळ दिले.
17तेव्हा ते सर्व जेवून तृप्त झाले; आणि त्यांनी मोडलेल्या तुकड्यांतले उरले ते बारा टोपल्या भरून त्यांनी उचलून घेतले.
18आणि असे झाले की तो एकांतात प्रार्थना करत असता शिष्य त्याच्याबरोबर होते, तेव्हा त्याने त्यांना विचारून म्हटले, लोकसमुदाय मला कोण म्हणून म्हणतात?
19मग त्यांनी उत्तर देऊन म्हटले, बाप्तिस्मा करणारा योहान, पण कित्येक म्हणतात एलीया, व कित्येक म्हणतात की पुरातन भविष्यवाद्यांतील कोणीएक पुन्हा उठला आहे
20त्याने त्यांना म्हटले, पण तुम्ही मला कोण म्हणून म्हणता? तेव्हा पेत्राने उत्तर देऊन म्हटले, “देवाचा ख्रिस्त.“
21पण हे कोणाला सांगू नये अशी त्याने त्यांना निक्षून आज्ञा केली.
22आणि म्हटले, मनुष्याच्या पुत्राने पुष्कळ दुःखे सोसावी, आणि वडील व मुख्य याजक व नियमशास्र शिक्षक यांच्याकडून नाकारले जावे, व जीवे मारले जावे, व तिसऱ्या दिवशी पुन्हा उठवले जावे, ह्याचे अगत्य आहे.
23आणि तो सर्वांना म्हणाला, जर कोणी माझ्यामागे येऊ इच्छितो तर त्याने स्वतःला नाकारावे व दररोज आपला वधस्तंभ उचलून घ्यावा व माझ्यामागे चालावे.
24कारण जो कोणी आपला जीव वाचवू इच्छितो तो त्याला गमावील, परंतु जो कोणी माझ्याकरता आपला जीव गमावील तो त्याला वाचवील.
25कारण माणसाने सगळे जग मिळवून स्वतःला गमावले किंवा स्वतःचा नाश करून घेतला तर त्याला काय लाभ होईल?
26जो कोणी माझ्याविषयीची व माझ्या वचनाविषयी लाज धरील त्यांच्याविषयींची लाज मनुष्याचा पुत्र जेव्हा आपल्या स्वतःच्या व बापाच्या व पवित्र दूतांच्या गौरवाने येईल तेव्हा धरील.
27आणि मी तुम्हास खचीत सांगतो की, येथे उभे राहणाऱ्यांतले काही असे आहेत की, ते देवाचे राज्य पाहतील तोपर्यंत त्यांना मरणाचा अनुभव येणारच नाही.
28आणि या गोष्टी सांगितल्यानंतर सुमारे आठ दिवसांनी असे झाले की, पेत्र व योहान व याकोब यांना बरोबर घेऊन तो प्रार्थना करायला डोंगरावर गेला.
29तेव्हा तो प्रार्थना करीत असता त्याच्या मुखाचे रूप पालटले व त्याचे वस्त्र पांढरे लखलखीत झाले.
30आणि पाहा, दोन पुरूष त्याच्याशी संभाषण करीत होते; हे मोशे व एलीया होते,
31ते तेजस्वी दिसत होते, आणि जे त्याचे प्रयाण तो यरूशलेमेत पूर्ण करणार होता, त्याविषयी ते बोलत होते.
32तेव्हा पेत्र व त्याच्याबरोबर जे होते ते झोंपेने भारावले होते, परंतु ते पूर्णपणे जागे झाले तेव्हा त्यांचे तेज, आणि जे दोन पुरूष त्याच्याजवळ उभे राहिले होते त्यांनाही पहिले.
33मग असे झाले की ते त्याच्यापासून दूर होत असता पेत्राने येशूला म्हटले, हे गुरु, येथे असणे आम्हास बरे आहे; तर आम्ही तीन मंडप करू, तुझ्यासाठी एक व मोशेसाठी एक व एलीयासाठी एक. आपण काय बोलत आहोत याचे त्याला भान नव्हते.
34तो या गोष्टी बोलत असता एक ढग येऊन त्यांच्यावर सावली करू लागला, आणि ते ढगांत शिरले तेव्हा ते भ्याले.
35आणि ढगांतून वाणी आली, ती म्हणाली, हा माझा निवडलेला पुत्र आहे, याचे तुम्ही ऐका
36आणि ही वाणी झाल्यावर येशू एकटाच दिसला आणि ते उगेच राहिले, व ज्या गोष्टी त्यांनी पहिल्या होत्या त्यांतले कांहींच त्यांनी त्या दिवसांमध्ये कोणाला सांगितले नाही.
37आणि असे झाले की दुसऱ्या दिवशी ते डोंगरावरून खाली आल्यावर मोठा लोकसमुदाय त्याला भेटला.
38तेव्हा पाहा, समुदायातील एक माणूस मोठ्याने ओरडून म्हणाला, हे गुरु, मी तुला विनंती करतो, माझ्या मुलाकडे पाहा, कारण तो माझे एकुलते मूल आहे.
39आणि पाहा, कोणी आत्मा त्याला धरतो, आणि हा एकाएकी ओरडतो, मग तो ह्याला असा पिळतो की त्याच्या तोंडाला फेस येतो, तो याला पुष्कळ त्रास देतो व ह्याला मोठ्या प्रयासाने सोडून जातो.
40आणि तो काढावा म्हणून मी तुझ्या शिष्यांना विनंती केली, परंतु त्यांच्याने तो निघेना.
41तेव्हा येशूने उत्तर देऊन म्हटले, हे अविश्वासी व विपरीत पिढी, मी कोठपर्यंत तुमच्याबरोबर राहू व तुमचे सोसू? तू आपल्या मुलाला इकडे आण.
42मग तो जवळ येत आहे इतक्यात भूताने त्याला खाली आपटले, व भारी पिळून टाकले, पण येशूने त्या अशुध्द आत्म्याला धमकावले, व मुलाला बरे करून त्याच्या बापाजवळ परत दिले.
43मग देवाचे हे महान सामर्थ्य पाहून सर्व लोक थक्क झाले. आणि तो जी कामे करीत होता त्या सर्वांवरून सर्व जण आश्चर्य करीत असता तो आपल्या शिष्यांना म्हणाला,
44या गोष्टी तुम्ही लक्षांत ठेवा कारण मनुष्याचा पुत्र माणसांच्या हाती दिला जाणार आहे.
45परंतु हे बोलणे त्यांना समजले नाही, व त्यांना ते समजू नये म्हणून ते त्यांच्यापासून गुप्त राखलेले होते; आणि ते या बोलण्याविषयी त्याला विचारायला भीत होते.
46त्यानंतर आपणांमध्ये कोण मोठा आहे याविषयी त्यांच्यामध्ये वादविवाद उठला.
47तेव्हा येशूने त्यांच्या अंतःकरणाचे विचार जाणून एका बालकाला जवळ घेऊन त्याला आपल्यापाशी उभे केले,
48आणि त्यांना म्हटले, जो कोणी माझ्या नावाने या बालकाला स्वीकारतो तो मला स्वीकारतो, आणि जो कोणी माझा स्वीकार करतो तो ज्याने मला पाठवले त्याचा स्वीकार करतो; कारण तुम्हा सर्वांमध्ये जो सर्वांहून लहान आहे तोच मोठा आहे.
49तेव्हा योहानाने उत्तर देऊन म्हटले, हे गुरु, आम्ही कोण एकाला तुझ्या नावाने भुते काढतांना पाहिले, आणि आम्ही त्याला मना केले, कारण तो आमच्याबरोबर तुझ्यामागे चालत नाही.
50तेव्हा येशूने त्याला म्हटले, मना करू नका, कारण जो तुम्हाला प्रतिकूल नाही तो तुम्हाला अनुकूल आहे.
51आणि असे झाले की त्याला वर घेतले जाण्याचा समय जवळ आला तेव्हा यरूशलेमेस जाण्याच्या दृढनिश्चयाने त्याने आपले तोंड वळवले.
52मग त्याने आपल्यापुढे निरोप्ये पाठवले, तेव्हा ते निघून त्याच्यासाठी तयारी करण्यास शोमरोन्यांच्या एका गावात गेले,
53पण त्यांनी त्याला अंगीकारले नाही, कारण यरूशलेमेकडे जाण्याचा त्याचा रोख होता.
54तेव्हा त्याचे शिष्य याकोब व योहान हे पाहून म्हणाले, हे प्रभू, एलीयाने केले होते तसेच आकाशांतून अग्नीने पडून त्याचा नाश करावा म्हणून आम्ही आज्ञा करावी, अशी तुझी इच्छा आहे काय?
55परंतु त्याने वळून त्यांना धमकावले आणि म्हटले, तुम्ही कोणत्या आत्म्याचे आहा हे तुम्हास ठाऊक नाही;
56कारण मनुष्याचा पुत्र माणसांच्या जीवाचा नाश करायला नाही, तर त्यांना तारायला आला आहे. मग ते दुसऱ्या गावाला गेले.
57आणि ते वाटेने चालत असता कोणीएक त्याला म्हणाला, जेथे कोठे तू जाशील तेथे मी तुझ्यामागे येईन.
58तेव्हा येशू त्याला म्हणाला, खोकडांस बिळे व आकाशांतल्या पाखरांस घरटी आहेत, परंतु मनुष्याच्या पुत्राला आपले डोके टेकायला ठिकाण नाही.
59मग त्याने दुसऱ्या एकाला म्हटले, माझ्यामागे ये. परंतु तो म्हणाला, हे प्रभू, पहिल्याने मला जाऊ दे, आणि माझ्या बापाला पुरूं दे,
60तेव्हा येशूने त्याला म्हटले, मेलेल्यांना आपल्या मेलेल्यांस पुरू दे, परंतु तू जाऊन देवाच्या राज्याची घोषणा कर.
61तेव्हा आणखी एकजण म्हणाला, हे प्रभू, मी तुझ्यामागे येईन, परंतु पहिल्याने मला माझ्या घरात जे आहे त्यांचा निरोप घेऊ दे.
62पण येशूने त्याला म्हटले, जो कोणी नांगराला आपला हात घातल्यावर मागील गोष्टींकडे पाहत राहतो असा कोणीही देवाच्या राज्याला उपयोगी नाही.