1যিহোৱাই পুনৰায় মোচি আৰু হাৰোণক কলে,
2“ইস্ৰায়েলৰ সন্তানসকলে তেওঁলোকৰ নিজ নিজ সৈন্য দলৰ পিতৃ-বংশৰ নিচানৰ পতাকাৰ গুৰিৰ চৰিওফালে তম্বু তৰি থাকিব লাগিব। তেওঁলোকৰ তম্বু সাক্ষাৎ কৰা তম্বুলৈ মুখ কৰি থাকিব লাগিব।
3যিহূদাৰ ছাউনিৰ অধীনে থকা লোকসকলে নিজ নিজ সৈন্যদল অনুসাৰে, পূৱদিশে থকা সাক্ষাৎ কৰা তম্বুৰ ফালে অৰ্থাৎ সূৰ্য্য উদয় হোৱা দিশে তম্বু তৰি যিহূদাৰ পতাকাৰ চাৰিওফালে থাকিব লাগিব। অম্মীনাদবৰ পুত্ৰ নহচোন যিহূদাৰ সন্তানসকলৰ অধ্যক্ষ হ’ব।
4তেওঁৰ সৈন্যসমূহৰ গণিত লোক আছিল চৌসত্তৰ হাজাৰ ছশ জন।
5তেওঁলোকৰ কাষত ইচাখৰ জনগোষ্ঠীয়ে তম্বু তৰি থাকিব লাগিব। চূৱাৰৰ পুত্ৰ নথনেলে ইচাখৰৰ সন্তানসকলৰ অধ্যক্ষ হ’ব।
6তেওঁৰ সৈন্যসমূহৰ গণিত লোক আছিল চৌৱন্ন হাজাৰ চাৰিশ জন।
7তেওঁলোকৰ কাষত জবূলূনৰ জনগোষ্ঠীয়ে ছাউনি পাতিব লাগিব। হেলোনৰ পুত্ৰ ইলীয়াব জবূলূনৰ সন্তানসকলৰ অধ্যক্ষ হ’ব।
8তেওঁৰ সৈন্যসমূহৰ গণিত লোক আছিল সাতাৱন হাজাৰ চাৰিশ জন।
9যিহূদাৰ ছাউনিৰ গণিত লোক, নিজ নিজ সৈন্যদল অনুসাৰে, সৰ্ব্বমুঠ আছিল এক লাখ ছয়াশী হাজাৰ চাৰিশ জন। প্ৰথমে তেওঁলোকে ছাউনিৰ পৰা প্ৰস্থান কৰিব।
10দক্ষিণ দিশে থকা সৈন্যদলবোৰে ৰূবেণৰ ছাউনিৰ পতাকাৰ চাৰিওফালে থাকিব। চদেয়ূৰৰ পুত্ৰ ইলীচূৰ ৰূবেণৰ সন্তানসকলৰ অধ্যক্ষ হ’ব।
11তেওঁৰ সৈন্যসমূহৰ গণিত লোক আছিল ছয়চল্লিশ হাজাৰ পাঁচশ জন।
12তেওঁলোকৰ কাষত চিমিয়োনৰ জনগোষ্ঠীয়ে তম্বু তৰি থাকিব। চুৰিচদ্দয়ৰ পুত্ৰ চলূমীয়েল চিমিয়োনৰ সন্তানসকলৰ অধ্যক্ষ হ’ব।
13তেওঁৰ সৈন্যসমূহৰ গণিত লোক আছিল ঊনষাঠি হাজাৰ তিনিশ জন।
14তেওঁলোকৰ কাষত গাদৰ জনগোষ্ঠী থাকিব। ৰূৱেলৰ পুত্ৰ ইলীয়াচফ গাদৰ সন্তানসকলৰ অধ্যক্ষ হ’ব।
15তেওঁৰ সৈন্যসমূহৰ গণিত লোক আছিল পঞ্চল্লিশ হাজাৰ ছশ পঞ্চাশ জন।
16ৰূবেণৰ ছাউনিৰ গণিত লোক, নিজ নিজ সৈন্যদল অনুসাৰে, সৰ্ব্বমুঠ আছিল এক লাখ একাৱন্ন হাজাৰ চাৰিশ পঞ্চাশ জন। তেওঁলোকে দ্বিতীয় হৈ ছাউনিৰ পৰা প্ৰস্থান কৰিব।
17তেওঁলোকৰ সৈন্যদলৰ পাছত ছাউনিবোৰৰ মাজত লেবীয়াসকলৰ ছাউনি ৰাখি, সাক্ষাৎ কৰা তম্বু নিয়া হ’ব; প্ৰতিজনে যি দৰে তম্বু তৰে, সেই দৰে নিজ নিজ শ্ৰেণীত থাকি, নিজ নিজ পতাকাৰ কাষে কাষে প্ৰস্থান কৰিব।
18সাক্ষাৎ কৰা তম্বুৰ পশ্চিম দিশে, নিজ নিজ সৈন্যদল অনুসাৰে, ইফ্ৰয়িমৰ জনগোষ্ঠীয়ে ছাউনি পাতি থাকিব। অম্মীহূদৰ পুত্ৰ ইলীচামা ইফ্ৰয়িমৰ সন্তানসকলৰ অধ্যক্ষ হ’ব।
19তেওঁৰ সৈন্যসমূহৰ গণিত লোক আছিল চল্লিশ হাজাৰ পাঁচ শ জন।
20তেওঁলোকৰ কাষত মনচিৰ জনগোষ্ঠী থাকিব। পদাচূৰৰ পুত্ৰ গম্লীয়েল মনচিৰ সন্তানসকলৰ অধ্যক্ষ হ’ব।
21তেওঁৰ সৈন্যসমূহৰ গণিত লোক আছিল বত্ৰিশ হাজাৰ দুশ জন।
22তেওঁলোকৰ পাছত আহিব বিন্যামীনৰ জনগোষ্ঠী। গিদিয়োনীৰ পুত্ৰ অবীদান বিন্যামীনৰ সন্তানসকলৰ অধ্যক্ষ হ’ব।
23তেওঁৰ সৈন্যসমূহৰ গণিত লোক আছিল পঁয়ত্ৰিশ হাজাৰ চাৰিশ জন।
24ইফ্ৰয়িমৰ ছাউনিৰ গণিত লোক, নিজ নিজ সৈন্যদল অনুসাৰে, সৰ্ব্বমুঠ আছিল এক লাখ আঠ হাজাৰ এশ জন। তেওঁলোকে তৃতীয় হৈ প্ৰস্থান কৰিব।
25সাক্ষাৎ কৰা তম্বুৰ উত্তৰ দিশে দানৰ সৈন্যদলে তেওঁলোকৰ পতাকাৰ চাৰিওফালে ছাউনি পাতিব। অম্মীচদ্দয়ৰ পুত্ৰ অহীয়েজৰ দানৰ সন্তানসকলৰ অধ্যক্ষ হ’ব।
26তেওঁৰ সৈন্যসমূহৰ গণিত লোক আছিল বাষষ্ঠী হাজাৰ সাতশ জন।
27তেওঁলোকৰ কাষতে আচেৰৰ জনগোষ্ঠীয়ে তম্বু তৰি থাকিব। আক্ৰনৰ পুত্ৰ পগীয়েল আচেৰৰ সন্তানসকলৰ অধ্যক্ষ হ’ব;
28তেওঁৰ সৈন্যসমূহৰ গণিত লোক আছিল একচল্লিশ হাজাৰ পাঁচ শ জন।
29তেওঁলোকৰ পাছত আহিব নপ্তালী ফৈদ। ঐননৰ পুত্ৰ অহীৰা নপ্তালীৰ সন্তানসকলৰ অধ্যক্ষ হ’ব;
30তেওঁৰ সৈন্যসমূহৰ গণিত লোক আছিল তেপন্ন হাজাৰ চাৰিশ জন।
31দানৰ ছাউনিৰ গণিত লোক সৰ্ব্বমুঠ আছিল একলাখ সাতাৱন্ন হাজাৰ ছশ জন। তেওঁলোকে ছাউনিৰ পৰা নিজ নিজ পতাকা লৈ, শেষত প্ৰস্থান কৰিব।”
32ইস্ৰায়েলৰ সন্তানসকলৰ পিতৃ-বংশৰ সৰ্ব্বমুঠ ছয় লাখ তিনি হাজাৰ পাঁচশ পঞ্চাশ জন সৈন্যদল অনুসাৰে ছাউনিবোৰৰ গণিত লোক আছিল।
33কিন্তু যিহোৱাই মোচিক দিয়া আজ্ঞা অনুসাৰে, লেবীয়াসকলক ইস্ৰায়েলৰ সন্তানসকলৰ মাজত গণনা কৰা নহ’ল।
34যিহোৱাই মোচিৰ দ্ৱাৰা দিয়া আজ্ঞা অনুসাৰে ইস্ৰায়েলৰ সন্তানসকলে সেই সকলো কাৰ্য কৰিলে। তেওঁলোকে নিজ নিজ গোষ্ঠী আৰু পিতৃ-বংশ অনুসাৰে নিজ নিজ পতাকাৰ গুৰিত তম্বু তৰিলে আৰু সেই দৰেই প্ৰস্থান কৰিলে।